Vatnsmikið veiðisumar..?

Vatnsmagn í veiðiám er ein af stóru breytunum í veiðinni.  Það er ýmist of eða van og breytileiki milli ára getur verið ótrúlega mikill.  Snjómagn í upphafi sumars er forðabúrið og ræður miklu um framvinduna.  Hitastig og úrkoma ráða einnig miklu - enda bráðnar snjór víst ekki í kulda og rigning hefur yfirleitt bein áhrif á vatnsmagn.
Ekki man ég hvernig vatnabúskapurinn 2014 var sv-lands en hér nyrðra var leysing fram í ágúst. Það bitnaði á veiðinni.
Til að spá fyrir um vatnasumarið 2015 náði ég mér í kort sem sýnir mismun á snjómagni í byrjun maí á milli áranna 2015 og 2014.
Það sést að suðvestan áttir voru ríkjandi í vetur - meiri snjór sunnan við línu dregna frá Djúpi og austur á Djúpavog.  Að sama skapi er minna af snjó norðan við þessa línu.  Úfrá þessu má álykta að veiðimenn landsins verði í góðum málum - við viljum jú meiri snjó á sv-landi af því þar skortir oft á vatn í árnar og við viljum minni snjó á na-landi því þar er oft of mikið vatn.

En þetta var í maí......

Og síðan þá hefur snjóinn á Norðurlandi ekki tekið upp, frekar bætt í.  Enda var maí óvenju kaldur. Í upphafi júní 2015 höfum við því meiri snjó á landinu öllu en á sama tíma fyrir ári.

Við hér Norðanlands erum því sennilega að sjá svipað sumar og í fyrra og hittiðfyrra - þ.e. alltof mikið vatn fram í ágúst.  Sv-hlutinn verður sennilega í góðum málum.