Vatnsmikið veiðisumar..?

Vatnsmagn í veiðiám er ein af stóru breytunum í veiðinni.  Það er ýmist of eða van og breytileiki milli ára getur verið ótrúlega mikill.  Snjómagn í upphafi sumars er forðabúrið og ræður miklu um framvinduna.  Hitastig og úrkoma ráða einnig miklu - enda bráðnar snjór víst ekki í kulda og rigning hefur yfirleitt bein áhrif á vatnsmagn.
Ekki man ég hvernig vatnabúskapurinn 2014 var sv-lands en hér nyrðra var leysing fram í ágúst. Það bitnaði á veiðinni.
Til að spá fyrir um vatnasumarið 2015 náði ég mér í kort sem sýnir mismun á snjómagni í byrjun maí á milli áranna 2015 og 2014.

Eyjafjarðará 2014

Mynd 1 / Fyrsta svæði í Eyjafjarðará

Heldur er hann hægfara batinn á bleikjunni í Eyjafjarðará.   Lokatölur 2014 voru 449 bleikjur, 236 urriðar og 2 laxar - samtals 687 fiskar.   Það er næstlakasta bleikjuveiðin frá 1991 og sömuleiðis næstlægsta heildartalan. Aðeins árið í fyrra var lakara.
Urriðaveiðin var hinsvegar yfir meðaltali en hefur þó ekki verið lægri síðan 2007 og 2008. Tíðindið eru kannski að aftur veiðist meira bleikju en urriða.  Þannig hefur það hefur reyndar verið alla tíð, ef frá eru talin árin 2012 og 2013.

Veiða og sleppa á bleikju

Ritgerðin mín loksins fullgerð - hér er hún í fullri lengd (pdf) fyrir áhugasama og aðra - og sem veftímarit hér.
Þetta er búin að vera mikið og lærdómsríkt ferðalag - sex ár frá brottfarardegi, með ýmsum áningarstöðum.  Ég er stoltur af gripnum, stundaði þessi vísindi af forvitni, sönnum áhuga og virðingu fyrir viðfangsefninu.  Prófgráðan var tækið til að geta framkvæmt þetta en ekki markmiðið í sjálfu sér.  Ég er þakklátur öllum þeim sem tóku þátt á einn eða annan hátt.  Sérstakar þakkir fá efasemdarmenn veiða og sleppa aðferðarinnar - því ef enginn hefði efinn verið, þá hefði mér ekki dottið þetta til hugar.
Næst er það doktorsnámið og meiri bleikjurannsóknir.  Ef maður ætlar að vera veiðinörd þá er best að fara alla leið....
Set útdráttinn á næstu síðu.

Master of science....

Erlendur Steinar Friðriksson heldur meistaravörn sína föstudaginn 31. janúar 2014 kl. 13:00 í fyrirlestrarsal M102 í aðalbyggingu HA, Miðborg. Verkefni Erlends Steinars, er 90 ECTS verkefni til meistaragráðu í auðlindafræðum og nefnist Veiða og sleppa sem veiðistjórnun á bleikju í Eyjafjarðará.

Veiðistjórnun á bleikju

Ég var að velta fyrir mér veiðistjórnun á bleikju á Íslandi.  Tók saman mynd og töflu yfir helstu bleikjuveiðisvæðin frá 2007 - ásamt yfirliti yfir veiðistjórnun eða öllu heldur kvóta á bleikju. Veiðitölurnar eru úr skýrslum veiðimálstofnunar en upplýsingar um veiðistjórnun af ýmsum veiðisíðum.
Í töflunni kemur fram að aðeins 6 af þessum svæðum eru með kvóta á bleikjunni.  Hugsanlega er ég með rangar upplýsingar um einhver svæðin - það væri vel þegið ef menn vita betur að þeir láti mig.  696-5464 eða erlendursteinar(at)gmail.com.

Eru selir ógn eða æði...?

Skjáskot af akv.is

Mál dagsins er frétt um seladráp við ósa Eyjafjarðarár. Sjá hér:

Löngum hefur tíðkast að skjóta seli við ósa áa - jafnt í Eyjafirði sem annarsstaðar,  menn líta á selinn sem ógn við fiskistofna ánna...

Stóra spurningin er þá hvort selur sé ógn eða æði....

Étur hann fisk eða flugu?

Heimildum ber ekki saman...

Ég hef heyrt í heitapottinum að aldrei hafi fundist selur með ummerki um silung í mallakút...

Erlingur á selsetrinu veit hugsanlega allt um það - 

Við kannski spurjum hann...

Það er hinsvegar rétt að halda því til haga að stofnsstærð Kampsels er talin vera um 1.000.000 dýr.

Bleikjustofninn í Eyjafjarðará er hinsvegar á gjörgæslu, Veiði þar hefur farið úr 3500 fiskum, þegar mest var, í rúmlega 500 fiska á síðasta ári.  Stofnstærðin gæti því verið komin niður í 1-10 þúsund fiskar.  Í ljósi þessa hefur verið tekin upp veiðistjórnun með aflakvóta.

Það er alveg ljóst að ef selur ætlar að éta bleikjuna mína þá finnst mér hann í órétti...

Snjórinn og vorið..

Hvað sem öðru líður þá eru bátarnir mættir á Pollinn
og í silunginn.  
 Þar eru svo litlir og sætir að lög gilda ekki um þá  -
 eða það finnst þeim amk...

Hér nyrðra hafa siðustu vor verið frekar mild og snjólétt, flestar ár í firðinum auðar seinnipart apríl.  Þá hafa raddir vaknað meðal veiðimanna sem vilja hefja veiðar fyrr á vorin.  Urriðinn að vakna til lífsins í ánum sjálfum og sjóbleikja og birtingur kominn í fæðugöngur á ósasvæðin.  Það er sjálfsagt að prufa og opna einhverjar ár fyrr.  Huga verður þó að veiðistjórnun og kvótasetningu.  Fleiri veiðidagar auka veiðiálag og sennileg mega fæstir bleikjustofnarnir við því.  Nú er veiði t.d.  hafin í Hörgánni - hef svosem lítið frétt af aflabrögðum - en eitthvað hefur kroppast upp.   Það verður athyglisvert að fylgjast með þróun mála þar.

Það ótrúlega mikill munur á snjómagni innan fjarðarins - yst í firðinum er langt í að árnar verði veiðanlegar en hér innar hafa ár verið snjólausar og veiðanlegar í einhverjar vikur.  Hér eru nokkrar myndir teknar síðustu daga.

Glerá

Sendi inn 4 umsóknir í Fiskiræktarsjóð - ein þeirrra var vegna fiskiræktar í Glerá.  Það á sér forsögu;   Í  lok árs 2011, óskaði SVAK eftir viðræðum við Akureyrarbæ vegna Glerár. Hugmyndin var að SVAK tæki við umsjá árinnar og ræktaði upp í henni fiskistofn - með einum eða öðrum hætti.  Vel var tekið í erindið en ekki afgreitt og er enn í bið. Jafnframt var sótt var leyfi Fiskistofu til fiskiræktar í ánni og fengust þau leyfi, þó með fyrirvara um að veiðifélag Glerár staðfesti áætlunina.   Og nú stendur á því - Akureyrarbær og Norðurorka eiga Glerá og þyrftu að stofna veiðifélag sem staðfest gæti fyrirkomulagið.

Magafylli laxa og Vorflugupúpur

Aldrei hafa mér þótt myndir af fiski á aðgerðaborði vera smekklegar, en set þó eina slika inn.   Fyrir því eru sérstakar ástæður,  því fiskurinn reyndist einstakur og ýmislegt kom á óvart við aðgerðina...
Þannig er að seinni hlutinn af júli er frábær tími í bleikjunni hér í firðinum - þar sem formúlan er gott veður, fallandi vatn, nýgenginn bleikja, uppstrím fimman í hendi og Pheasant Tail á taumnum.
Einfaldlega ávísun á hamingju.  Þótt ég sé ekkert sérstaklega fiskinn rek ég stundum í fisk og jafnvel hirði ég einn til að hafa með heim á grillið - eða tvo.

Vetrarstarf veiðimanna - Bleikjan....

Var með erindi hjá stangveiðifélögunum í kvöld - um bleikju.  Fin mæting og góðar umræður - takk kærlega fyrir komuna.  Einhverjir höfðu á orði að þeir hefðu ekki séð nógu vel glærunar - hér eru þær allar....

MS-inngangur

umþaðbileinhvernveginnsvona gæti inngangurinn í ritgerðinni minni litið út..

Lax- og silungur hefur verið nytjaður hér á landi frá landnámi, fyrst sem matarkista en síðustu áratugi sem stangveiðisport.  Óhætt er að flokka þessa fiskistofna sem verulega verðmæta náttúruauðlind enda voru bein, óbein og afleidd áhrif stangveiða á laxi og silungi á þjóðarbúið metin árið 2004 á allt að 9 milljarða (Hagfræðistofnun Háskóla Íslands, 2004) og aftur árið 2009 á 15 milljarða (Sigurbergur Steinsson, 2010). 

Ólafsfjarðará

Í tilefni þess að Raggi Hólm var með kynningu á Ólafsfjarðará og að SVAK opnaði á sölu leyfa í ánna, tók ég saman smá tölfræði um veiðina í Óló...

Það er svosem fátt sem kemur mér á óvart í þeirri samantekt.  Besta veiðin er frá opnun og fram í miðjan ágúst - og reyndar mesta sóknin.
Veiðin í ánni hefur heldur verið á niðurleið síðustu árin,  þó kom athyglisverður kippur í veiðina í september 2011.  Reyndar má segja að septemberdagarnir séu vanmetnir í ánni - nánast ekkert selst af þeim,  þó eru þeir hræódýrir og yfirleitt gefa þessir fáu dagar sem þó eru nýttir nokkra veiði.  En tölfræðina má sjá hérneðar..

Innrás urriðans

Eyjafjarðará blómstrar sem sjóbirtingsá enda veiddust 620 urriðar eða sjóbirtingar þar í sumar.  Sá stærsti var 6,5 kg og 82 cm , fjölmargir voru á bilinu 2-4 kg.  Þetta er langbesta urriðaveiði í skráðri sögu árinnar.
Hinsvegar fækkar bleikjunni enn og veiddust innan við 500 bleikjur í sumar.
Hér neðar setti ég nokkur gröf með veiðitölum sumarsins - athugið að um bráðabirgðatölur er að ræða.
Myndirnar tala...

Sælir eru silungsveiðimenn...

8 pund 66cm, tòk à maðk rètt fyrir ofan svæðamót à 1 og 2 í Hörgá veiðimaður er Haukur Már Hergeirsson

Því þeir þurfa ekki lax að veiða:)
Ég er nógu mikill veiðinörd til þess að taka saman silungsveiðitölur úr nærumhverfi mínu, endrum og eins.   Þarna eru á ferðinni mun jákvæðari tölur en heyrast úr laxaheiminum....

Laxveiðin og Fnjóská

Þetta sumarið er veiði í flestum laxveiðiám með lakara móti.
það voraði snemma, a.m.k. hér nyrðra, laxinn mætti snemma og allt leit afskaplega vel út.  Framan af sumri var því veiðin í góðu meðallagi, en þá dundu ósköpin yfir.  Smálaxinn skilaði sér ekki......
Í Fnjóská hafa síðustu 4 vikur verið þær lökustu en sæmbærilegar vikur frá og með 2006.

Héðinsfjörðurinn

er aðgengilegri eftir að göngin komu. Margir telja að áin verði ofveidd, aukin sókn og aukin veiðiþjófnaður.  Ég held þvert á móti að nú verði betur tekið á málum þarna.  Ógnin er og verður veiðiþjófnaður í sjónum;  sá, þessi og hinn virðist líta á það sem köllun sína að veiða lax og silung í net í sjó...

Allt um það, Héðinsfjörðurinn er fallegur, áin er nett, 2-3 m3 og nokkuð skemmtileg veiðiá, hentar ágætlega fyrir flotlínu og #3-#5.  Oft veiðist ágætlega þarna og bleikjan er nokkuð væn, eða í kringum um 45 cm að jafnaði.   

2012_10_FnjóskáV

Snemma á fimmtudagsmorgni, enn einn blíðviðrisdagurinn að renna upp, ég á leiðinni á upphaldsveiðisvæðið mitt í öllum heiminum.  Fjörðurinn friðsamur og fagur, blár útí buskann, undir Vaðlaheiðinni dimmur og dullarfullur,  Kaldbakurinn skemmtilega fannhvítur og fjarlægur...semsagt allt er æðislegt og frábært.

2012_9 Eyjafjarðará sv3

Kikkaði á svæði 3 í Eyjafjarðará part úr kvöldvakt. Fór á tvo staði, fyrst á nýju breiðuna fyrir neðan Nesbreiðu, varð ekkert var.  Fór svo á Helgastaðabreiðuna, sem er einn alfallegasti veiðistaðurinn í firðinum.  Myndin af staðnum er ekki er ekki alveg nógu góð.  Náði í eina bleikju 45 cm og einn urriða 38 cm.  Setti í fleiri fiska þarna, en náði þeim ekki á land.  Ég held að það sé alltaf fiskur þarna...

Júní-Eyjafjörður

Góðviðri í júní hefur jafnan verið ávísun á mikla vatnavexti í Eyfirskum ám.  Þetta árið tókst veðurguðunum þó að bjóða uppá gott veður án mikilla vatnavaxta.  Sennilega ræður þar einhverju að lítill snjór var í fjöllum, t.d. var skaflinn við raflínurnar í Vaðlaheiðinni að mestu horfinn um miðjan júní eða mánuði fyrr en vanalega.   Veiði hefur líka farið ágætlega af stað. 

 Mjög góð bleikjuveiði hefur verið  á ósasvæði Hörgár allan júni en lítið hefur borið á urriða. Í systuránni Svarfaðardalsá blómstrar hinsvegar urriðinn og eru þar komnir þrefalt fleiri urriðar en á sama tíma í fyrra, þar hefur hinsvegar lítið borið á bleikju.

2012_05_Fnjóská

Kíkkaði í Fnjóská í dag, áin var í c.a. 60m3, sumir staðir ekki spennandi, en aðrir þeim mun laglegri.
   Fór á svæði 4 fyrir hádegi, byrjaði í Lygnu, heldur mikið vatn þar, svo á Lækjarbreiðu sem var mjög lagleg í þessu vatni - klárlega gæti bleikja lagst þar, amk biðu þar tveir bleikjuhængar sem nenntu ekki til sjávar þetta árið og létu glépjast af bleikum nobbler.  Fór svo í Systrahvamm, veiddi bara fyrir ofan brú.    Mér leiðist sá staður  -stundum er kaffið gott í sjoppunni:).  Endaði svo í Nesbugðunni, sem lúkkaði alveg frábærlega niður undir girðingu, seiðin í tjörninni lágu alveg við útfallið - sá samt ekki hvort þau voru að smolta.