Vatnsmikið veiðisumar..?

Vatnsmagn í veiðiám er ein af stóru breytunum í veiðinni.  Það er ýmist of eða van og breytileiki milli ára getur verið ótrúlega mikill.  Snjómagn í upphafi sumars er forðabúrið og ræður miklu um framvinduna.  Hitastig og úrkoma ráða einnig miklu - enda bráðnar snjór víst ekki í kulda og rigning hefur yfirleitt bein áhrif á vatnsmagn.
Ekki man ég hvernig vatnabúskapurinn 2014 var sv-lands en hér nyrðra var leysing fram í ágúst. Það bitnaði á veiðinni.
Til að spá fyrir um vatnasumarið 2015 náði ég mér í kort sem sýnir mismun á snjómagni í byrjun maí á milli áranna 2015 og 2014.

Hrollvekjandi hugmyndir

Það setti að mér hroll þegar ég sá um daginn, auglýsinguna um fyrirhugað eldi á norskættuðum laxi í sjókvíum á Eyjafirði, rétt norðan Hörgárósa.

Af því mér varð hugsað til allrar bleikjunnar og sjóbirtingsins sem lúsin í eldinu dræpi.  Hún dræpi kannski ekki alla bleikjuna og birtingin en sennilega allt að helming.  (Ef marka má norskar rannsóknir)

Og ekki var skárra að sjá fyrir sér þessa 2.400 norsku eldislaxar sem nær örugglega slyppu árlega og syntu í nær- og fjærliggjandi ár. (Norskar rannsóknir!)

Umfang og áhrif fyrirhugaðs sjókvíaeldis á norskum laxi á Eyjafirði

Fyrirhugað er umfangsmikið sjókvíaeldi á norskum laxi á Eyjafirði, rétt norðan Hörgárósa ¹.  Þar á að setja í kvíar 2,4 milljónir laxaseiða af norskum stofni og ala í tvö og hálft ár.  Af þessum 2,4 milljónum laxa má reikna með að 2.400 sleppi árlega og syndi í nær- og fjærliggjandi ár. Til samanburðar var meðalveiðin á laxi í Fnjóska síðustu 10 árin tæpir 500 laxar.

Svæðið sem um ræðir er 3 km langt og 1,2 km breitt, eða um 3,5 ferkílómetrar, það eru rúm 5% af flatar-máli Eyjafjarðar frá Hjalteyri að ósi Eyjafjarðarár.  Það er svæði á stærð við Pollinn frá Leirubrú og norður í slipp.  Frá fyrirhugaðri staðsetningu eru aðeins 2 km að ósi Hörgár, 6 km að Fnjóská og 15 km að Eyjafjarðará.   

Eyjafjarðará í mars

Sá nokkra fallega fiska í Eyjafjarðaránni í dag - þeir voru bara hressir í blíðunni - myndbandið má sjá hér neðar.  Áin íslaus og láglendi snjólaust. Það verða varla vandræði með vatnavexti fram eftir þessu sumri...
Unaðslegt.
Hlakka til...

Erindið var annars að huga að hentugri staðsetningu fyrir fiskiteljara sem setja á í ánna.   Staðsetningin ræðst af stórum hluta af markmiðinu með teljara.  Brýnast er að meta veiðiálag á bleikju - meðan það er ekki þekkt og stofninn (líklega) í lágmarki er erfitt að réttlæta afföll á bleikju vegna veiða.

Vér mótmælum sjókvíeldi á norskum laxi við Ísland..

Laugardaginn 28. febrúar var haldinn fundur á Hótel KEA á Akureyri um framkomnar umsóknir um opið sjókvíaeldi á Eyjafirði. Til fundarins var boðað af NASF, Verndarsjóði villtra laxastofna, veiðiréttareigendum, stangveiðifélögum og bátasjómönnum sem hafa viðurværi sitt af veiðum í firðinum.

Framsögumenn á fundinum voru þeir Orri Vigfússon, formaður NASF og Jón Helgi Björnsson formaður Veiðifélags Laxár í Aðaldal.

Um stangveiðar hér og þar....

Stangveiðar / sportveiðar eru risastórt fyrirbæri á heimsvísu - árlegur fjöldi stangveiddra fiska er um 50 milljarðar og þar af væru 17 milljarðar drepnir eða um 1/3.  Það þýðir þá að miklum meirihluta er sleppt aftur.  Umfang stangveiðar er orðið slíkt að þær svara til á milli 15-35% af heildarafla heimsins.
Á ýmsum ferskvatns- og strandsvæðum hafa stangveiðar tekið nytjaveiðar yfir og eru stangveiðar nú orðnar aðal ástæða veiðidauða hjá mörgum tegundum sem eru eða voru nytjastofnar.
Stangveiðar eru mikilvæg afþreying fyrir fólk víða um heim og haga gríðarlega víðtæk efnahagsleg áhrif, bæði svæðisbundin og á landsvísu.  Gott aðgengi að stangveiði er hluti af búsetutengdum lífsgæðum,  rétt einsog aðgengi að skíðasvæði eða sundlaug, góðum samgöngum, menntun og heilbrigðisþjónustu...!

Meira um þetta hér neðar....

Eyjafjarðará 2014

Mynd 1 / Fyrsta svæði í Eyjafjarðará

Heldur er hann hægfara batinn á bleikjunni í Eyjafjarðará.   Lokatölur 2014 voru 449 bleikjur, 236 urriðar og 2 laxar - samtals 687 fiskar.   Það er næstlakasta bleikjuveiðin frá 1991 og sömuleiðis næstlægsta heildartalan. Aðeins árið í fyrra var lakara.
Urriðaveiðin var hinsvegar yfir meðaltali en hefur þó ekki verið lægri síðan 2007 og 2008. Tíðindið eru kannski að aftur veiðist meira bleikju en urriða.  Þannig hefur það hefur reyndar verið alla tíð, ef frá eru talin árin 2012 og 2013.

Áttu bleikju í frystinum?

Kæri veiðimaður

Áttu nokkuð bleikju í frystinum?  

Ef svo er þá langar mig að biðja þig um smá aðstoð.

Þannig er að til rannsókna vantar mig talsvert af bleikjusýnum, helst bleikjuhausum. 

Ef þú átt bleikju og ert til í að aðstoða mig, hafðu þá endilega samband, ég mæti á svæðið og tek sýnið.  Það þarf ekki að afþíða fiskinn - við tökum hann bara úr frystinum í fimm mínútur og ég tek sýnið.

Ég get ekkert greitt fyrir aðstoðina, framlag til vísinda og einlægt þakklæti verða að duga:)

Veiða og sleppa á bleikju

Ritgerðin mín loksins fullgerð - hér er hún í fullri lengd (pdf) fyrir áhugasama og aðra - og sem veftímarit hér.
Þetta er búin að vera mikið og lærdómsríkt ferðalag - sex ár frá brottfarardegi, með ýmsum áningarstöðum.  Ég er stoltur af gripnum, stundaði þessi vísindi af forvitni, sönnum áhuga og virðingu fyrir viðfangsefninu.  Prófgráðan var tækið til að geta framkvæmt þetta en ekki markmiðið í sjálfu sér.  Ég er þakklátur öllum þeim sem tóku þátt á einn eða annan hátt.  Sérstakar þakkir fá efasemdarmenn veiða og sleppa aðferðarinnar - því ef enginn hefði efinn verið, þá hefði mér ekki dottið þetta til hugar.
Næst er það doktorsnámið og meiri bleikjurannsóknir.  Ef maður ætlar að vera veiðinörd þá er best að fara alla leið....
Set útdráttinn á næstu síðu.

Óstjórn stangveiða

Vorboðar veiðimanna eru margir - einn slíkur eru fréttir af stórurriðadrápi í Þingvallavatni ásamt stóryrtum og misvel-rökstuddum upphrópunum með eða á móti. Þarna er nú samt á ferðinni klassískt dæmi um nytjar á sameiginlegri en takmarkaðri auðlind.  Í raun skólabókardæmi sem fjallað er um bæði útfrá auðlindahagfræði og leikjafræði.  Í stuttu máli segir sagan okkur að ef nytjum á slíkum auðlindum er ekki stýrt, þá verður gengið að þeim þar til ekkert er eftir.   Með öðrum orðum - græðgi mannsins klárar auðlindina. Aðeins er hægt að koma í veg fyrir það með því að setja á sameiginlega stýringu á nýtingu auðlindarinnar, byggða á bestu fáanlegu upplýsingum.