Veiðisumarið mitt

Veiðisumarið hjá mér fer yfirleitt frekar rólega af stað. Megnið af veiðinni minni er í júli og ágúst en september svo í 3ja sæti.  Það sætir engum tíðindum enda sníð ég tímabilið að göngum bleikju og vatnafari.

Er lítið að sperra mig í apríl, enda eiginlega ennþá vetur, stundum er góð tíð, íslitlar ár og góðir dagar - apríl þetta árið var mjög rólegur hjá mér, tvær bryggjuferðir á Sigló var allt og sumt.

Maí getur gefið fallega daga, vorflóðin ekki hafin og spennandi að kíkka í ósableikju eða staðbundin vorurriða eða á bryggjurnar.  Þetta árið urðu bryggjunar fyrir valinu.

Veiðistjórnun á bleikju

Ég var að velta fyrir mér veiðistjórnun á bleikju á Íslandi.  Tók saman mynd og töflu yfir helstu bleikjuveiðisvæðin frá 2007 - ásamt yfirliti yfir veiðistjórnun eða öllu heldur kvóta á bleikju. Veiðitölurnar eru úr skýrslum veiðimálstofnunar en upplýsingar um veiðistjórnun af ýmsum veiðisíðum.
Í töflunni kemur fram að aðeins 6 af þessum svæðum eru með kvóta á bleikjunni.  Hugsanlega er ég með rangar upplýsingar um einhver svæðin - það væri vel þegið ef menn vita betur að þeir láti mig.  696-5464 eða erlendursteinar(at)gmail.com.

Eru selir ógn eða æði...?

Skjáskot af akv.is

Mál dagsins er frétt um seladráp við ósa Eyjafjarðarár. Sjá hér:

Löngum hefur tíðkast að skjóta seli við ósa áa - jafnt í Eyjafirði sem annarsstaðar,  menn líta á selinn sem ógn við fiskistofna ánna...

Stóra spurningin er þá hvort selur sé ógn eða æði....

Étur hann fisk eða flugu?

Heimildum ber ekki saman...

Ég hef heyrt í heitapottinum að aldrei hafi fundist selur með ummerki um silung í mallakút...

Erlingur á selsetrinu veit hugsanlega allt um það - 

Við kannski spurjum hann...

Það er hinsvegar rétt að halda því til haga að stofnsstærð Kampsels er talin vera um 1.000.000 dýr.

Bleikjustofninn í Eyjafjarðará er hinsvegar á gjörgæslu, Veiði þar hefur farið úr 3500 fiskum, þegar mest var, í rúmlega 500 fiska á síðasta ári.  Stofnstærðin gæti því verið komin niður í 1-10 þúsund fiskar.  Í ljósi þessa hefur verið tekin upp veiðistjórnun með aflakvóta.

Það er alveg ljóst að ef selur ætlar að éta bleikjuna mína þá finnst mér hann í órétti...

Veiðiskóli SVAK 2013

Þá er dagskrá veiðskólans í sumar klár:

• 10. bekkingar frá 1. júní
• Unglinganámskeið, 
• Veiðinámskeið fyrir byrjendur 
• Andstreymisveiði 
• Lærðu á ánna
• Einhendunámskeið 
• Tvíhendunámskeið 

Skráning er á elli(a)svak.is 

Snjórinn og vorið..

Hvað sem öðru líður þá eru bátarnir mættir á Pollinn
og í silunginn.  
 Þar eru svo litlir og sætir að lög gilda ekki um þá  -
 eða það finnst þeim amk...

Hér nyrðra hafa siðustu vor verið frekar mild og snjólétt, flestar ár í firðinum auðar seinnipart apríl.  Þá hafa raddir vaknað meðal veiðimanna sem vilja hefja veiðar fyrr á vorin.  Urriðinn að vakna til lífsins í ánum sjálfum og sjóbleikja og birtingur kominn í fæðugöngur á ósasvæðin.  Það er sjálfsagt að prufa og opna einhverjar ár fyrr.  Huga verður þó að veiðistjórnun og kvótasetningu.  Fleiri veiðidagar auka veiðiálag og sennileg mega fæstir bleikjustofnarnir við því.  Nú er veiði t.d.  hafin í Hörgánni - hef svosem lítið frétt af aflabrögðum - en eitthvað hefur kroppast upp.   Það verður athyglisvert að fylgjast með þróun mála þar.

Það ótrúlega mikill munur á snjómagni innan fjarðarins - yst í firðinum er langt í að árnar verði veiðanlegar en hér innar hafa ár verið snjólausar og veiðanlegar í einhverjar vikur.  Hér eru nokkrar myndir teknar síðustu daga.

SVAK og 10. bekkingarnir

Stangveiðifélag Akureyrar (SVAK) á 10 ára afmæli um þessar mundir.  Í tilefni þess er öllum 10. bekkingum á Akureyri boðið á fluguveiðinámskeið í júníbyrjun.

Námskeiðin eru hugsuð sem kynning á fluguveiðum, möguleikum til stangveiða, fiskitegundum, aðferðum og búnaði.  Nemendur fá að spreyta sig á flugustöng með leiðsögn.   Ekkkert gjald er á námskeiðin og veiðistangir verða á staðnum.    

Staðurinn er Leirutjörn

Til að allir fái sem besta þjónustu er skynsamlegt að forskrá þátttöku á elli(at)svak.is  eða  696-5464

Nokkur námskeið verða í boði:

Dauður fiskur hrygnir ekki...:)

Nálgun okkar á stangveiðar breytist hratt, sem betur fer, því stöðugt eykst veiðiálagið.  Hófsöm nýting, fiskur á grillið en ekki í frystinn og veiða&sleppa þar sem það sem við er sennilega það koma skal.  
Hér er fínt myndband frá Kanada um hvernig framkvæma á veiða&sleppa.

Hvalvatns-Fjarðará

SVAK og félögin eru með árkynningu í kvöld (mánudagkvöld 22.04.2013) -
Hvalvatns-Fjarðará verður í brennildeplinum.  Ég hef komið þarna - það er alger upplifun.  Áin er klassísk jökulskotin dragá, þar sem jökullitar getur gætt allt fram á haust.  Veiðin þarna virðist vera ýmist í ökkla eða eyra.  Það er sko alveg þess virði að skella sér einn túr þarna úteftir.  Hér neðar set ég inn veiðitölur, kynningarmyndband og nokkrar myndir.

Hofsá í Lýtó

Í kvöld ætlar Ármann að spjalla um Hofsá í Lýtó á vetrarstarfi veiðimanna.  SVAK tók ánna á leigu 2008 og á hún orðið marga aðdáendur, enda alger perla í afdal.  Breytileiki í veiðivon og aðstæðum til veiða háir ánni hinsvegar, því stundum gerir jökulskotið úr Fossánni svæðið óveiðandi.  Og veiðin er eftir þvi, ýmist í ökkla eða eyra...
Á sínum tíma eyddi SVAK nokkru púðri í að gera sumarhús við Litluhlíð að notalegum gistikosti, steyptur var upp heitur pottur, smiðaður pallur, ofl.  Síðan þá hafa Marta og Addi snurfusað svæðið í kring.  Nú er þetta orðið virkilega notalegt að koma þarna - eiginlega alger fjölskylduparadís.  Fór þarna í fyrra með familjunna - það var dásamalegt og nutu sín allir.

Efnahagsleg áhrif stangveiða

Ársfundur Veiðimálastofnunar er í dag.  Í ársskýrslunni metur Sigurður forstjóri veltu stangveiða á 20 milljarða, þar af renni til veiðiréttarhafa á annan milljarð.  Þetta hefur mér vitanlega ekki verið reiknað út síðan 2004 - tölur forstjórans eru því sennilega framreikningur miðað við verðlagsbreytingar.  Gríðarmargt hefur breytzt síðan 2004 - mikil aukning hefur verið í silungssókn, innlendinga og útlendinga og verð veiðileyfa hefur hækkað langt umfram verðlagsþróun.  Kæmi mér ekki á óvart þótt virðisaukningin hefði verið langt umfram verðlagsþróun.  Það er full ástæða til að taka svona skýrslu saman aftur.

Sigurður segir einnig:  "Nýting veiðihlunninda er því  ein af stærstu búgreinum landsins og afar mikilvæg  fyrir búsetu víða í sveitum landsins" ..